hamdysherif
مشرف عام المنتديات
عدد المساهمات : 255
تاريخ التسجيل : 23/08/2009
العمر : 35
 | موضوع: تعريف مبسط عن قسم كهربا قوي (لطلبه إعدادي )  الإثنين أغسطس 31, 2009 1:44 am | |
| ده ملف فيه التعريف بقسم كهربا قوي
http://www.almoultka.com/montada/upl...1236982487.doc
وده التقرير مكتوب علشان اللي مش مسطب الأوفيس
كهربا قوي
مش هتكلم كتير عن القسم بس هحاول أبين بعض النقط
• أولا الأماكن اللي بيتواجد فيها مهندس كهربا قوي
أي مصنع سواء صغير أو كبير
أي شركه سواء صغيره ولا كبيره
المحطات سواء توليد أو نقل أو توزيع
هتقولي بس ناقص مكان هقولك كويس أنك فكرتني
وكمان بيبقي موجود في المكاتب الإستشاريه
يعني من الاخر موجود في كل حته
هتقولي أيه يا عم .. ليه يعني ..؟؟؟ طب ازاي بيبقي موجود في الاماكن ديه وبيعمل ايه..؟؟؟
هقول هو قسم كهربا مفهوش تخصصات من جوه يعني هو مجال واحد
بس بيبقي في ميول جوه للمهندس كل واحد بيبقي ليه ميل لمجال معين
اللي هما ايه
• شغل المصانع والشركات
اللي هو ماشين (الات كهربيه )وكنترول
والتاني اللي هو
• شغل المكاتب الاستشاريه اللي هو مريح الي حد ما عن الاول
وبيبقي (Distrbution ) شغل التوزيع تروح المكتب يومين تلاته في الاسبوع
وفي المره بتاع ساعتين تلاته وتخلص الباقي في بيتك بس برضه شغل مش لعب
• وفيه مهندسين بيمشوا في الاتنين مع بعض
لان المكتب مبيشغلش وقتك ويا عالم ما يمكن أنت تكون صاحب المكتب أو تعملك
مشروع أوتفتح مصنع أو شركه صغيره (ربنا يوعدنا ومش صعبه خالص )
دا من ناحيه الحياه العمليه .
يعني الحمد لله متوافر في كل مكان ومتشلش هم
بس أرجع وأقولك الموضوع كله بتاع ربنا ويا عالم بس أنا بنقل صوره للي
موجود حوليا أو اللي شايفه قدامي لزمايلي اللي أكبر مني وأتخرجوا
يعني في الاول وفي الاخر نصيب .
نيجي بقي لنقطه تانيه الا وهي
قسم الكهربا نفسه
اللي ناس كتير واخده فكره غلط عنه أنه توصلك لمبه وسلكتين والكلام الفاضي ده (كهربائي يعني )
احنا بعيد تماما عن الموضوع
قسم كهربا زي ما وضحت قبل كده مجالات عمله
وبجد أنا بعتبره من الاقسام اللي فيها ابداع جامد فمثلا في مجال الكنترول تبقي محتاج ماكينه معينه تشتغل بوصف معين مثلا
تتحكم في سرعه موتور وبعد مده معينه يحددهالك يعكس حركته
ولما يعكس حركته ينقل الحركه لحاجه تانيه والتانيه تأثر علي ...... (ممكن
تتحكم في مصنع كامل بجميع الاته بضغطه واحده وتعمل كل اللي يخطر علي بالك
وانت بعيد عنها فانا بعتقد أن اللي قدر يعمل حاجه زي كده يبقي أكيد مبدع
وخصوصا انه بيبقي متوقع النتيجه قبل ما يبدأ في تنفيذها الا إذا كان فيه
أخطاء وعلي فكره مش تقدر تتحكم في مصنع واحد بس ممكن عده مصانع علي سبيل
المثال جميع شركات الكهربا اللي موجوده في مصرواللي بتبعد الالاف الكيلو
مترات عن بعضها متصله ببعض ويمكن التحكم فيها عن طريق نظام اسمه الاسكادا
مش عاوزين نخش في تفاصيل كتير بس بوضحلك أن القسم في إبداعات كتير
وعلي فكره مهندس كهربا هو برضه اللي بيصمم النظام اللي فات وكل الكلام اللي قولته من شويه
اتكلمنا عن مجالات العمل ومدي توافرها
وبعدين وضحنا ان قسم كهربا مش بيبقي مجرد شغل تكراري انما هو علم واسع
وملئ بالابداعات واللي ممكن تتوصل فيه لحاجات كتير لأن خباياه
كتييييييييييييييير الا إذا أنت حابب تشتغل شغل روتيني
طيب امال فين المشكله بقي
انا بالنسبه لي المشكله في الكليه
أيه بتقول ايه .........؟؟؟
هقولك زي ما قلت الكليه
طب ليه ......؟؟؟؟
هقولك بما ان العلم كبير أوي (علي فكره دا اكبر مما قلت بس انا قلت اللي
اعرفه واللي بفهم فيه شويه ) الكليه بتدرسلك دراسه أكادميه جدا مش بتتطرق
لسوء العمل كتير يعني بصراحه بتديلك بتاع 10 % او 15 % من الحياه العمليه
بس
بس ايه باقي دراستها بتأهلك انك تفهم او تتعلم الشغل اللي بره بسرعه جدا
وأرجع وأقولك متخفش فيه كورسات بتتاخد بره بتعوضلك حته النقص ديه زي ايه
Automatic control
Plc
Scada
دول في مجال التحكم هيخلوك جامد جدا في شغل الشركات والمصانع هتقولي طب ما ممكن اي حد ياخدهم ويبقي احسن مننا علي كده
هقولك ما انا بقولك دراستها (الكليه )بتساعدك أنك تفهم الشغل اللي بره
كويس (طب ما ده اللي بتلاقيها في شغلك )يعني علشان تفهم الكلام ده كويس
لازم تبقي دارس المواد اللي بتاخدها علي مدار السنين يعني محلوله متقلقش
أوك
طب والمجال التاني (المكاتب )
هقولك ده بقي مفيش اسهل منه
محتاج بس انك تبقي عارف برنامج اتوكاد
ويكون في مشروع متنفذ قدامك بس
ليه ......؟؟؟
لان انت علي مدار الاربع سنين بتبقي دارس معلومات متفرقه مش عارف تربطها ببعض
انما لما تقري بقي(أو تاخده كمشروع وده الأفضل لو ناوي تشتغل في المجال ده
) هتلاقي انا الصوره وضحت وعرفت تكون علاقات بين المواد اللي درستها
طيب اوك وايه نظام الدراسه بقي .......؟؟؟من الاخر سهله ولا صعبه .....؟؟؟
هقولك مكدبش عليك هي مش سهله وبرضه مش صعبه
هتقولي مش عارف والله من غيرك كنت عملت أيه فعلا اجابتك واضحه جدا
هقولك يعني فيها مواد رخمه ومواد برضه سهله انما من جهه الصعوبه انا برشحه انه ايكون تاني او تالت أصعب قسم
بس من الاخر انت لو بتذاكر عادي هتعدي
أهم حاجه بس انك تذاكر. فما بالك بقي لو عملت شويه مجهود تجيب تقدير كمان
بس المهم انك تذاكر ومن الاخر كمان كل الاقسام محتاجه مذاكره
وحط في دماغك ان كل اللي دخلوها قبلك وعدوا مش أحسن منك
بل بالعكس انت أحسن من ناس كتير
هتقولي ايه يا عم يعني الدراسه في الكليه مش قد كده وكمان الدراسه اللي مش كده ديه صعبه أمال أنت ايه اللي دخلك بقي ..؟؟؟
هقولك مفيش حلاوه من غير نار....؟؟؟ وانا قلت أستحمل سنتين ولاتلاته للحصول علي الهدف الأسمي لما اتخرج إن شاء الله
تفتكر مش يستحق انك تضحي ...؟؟؟
ده بالنسبه للدراسه مع العلم ان سنه رابعه بتحتك بالحياه العمليه جامد
(والمشروع بيبقي اول تجربه حقيقيه للشغل بره )اللي بتعمله هو اللي بتخرج
تلاقيه .
بصوا كفايه أوي كده لأني لو قعدت أتكلم لبكره مش هخلص
لأني بجد بحب القسم جدا جدا
ونصيحه
قبل ما تدخل أي قسم لازم تبقي مقتنع بيه تماما ولازم تكون حابه
لأن حبك ليه هو اللي هيخليك تتميز أو تبقي حاجه فيه وحط في دماغك ان الشغل بتاع ربنا وبيختف مدي توافره من وقت للتاني
ولازم قبل ما تحدد رغبتك في الكليه أنك تستخير ربنا
وربنا يوفقك في القسم اللي تدخل فيه وتكون حابه
وانا مستني أي أسئله أو إستفسارات عندكم لان مقدرتش أغطي كل الجوانب
ربنا يوفقكم
وبالنسبه للمواد بتاعه الترم الاول بما أني في أخر سنه والدكاتره اتغيرت وممكن يكون الوضع بيتطور للأحسن والأسهل
ده تقرير كانت عامله باشمهندسه أسيه للطلاب اللي كانوا داخلين السنه دي أولي
وكان بالنص ده
| |
|
